Archive for the 'جمعاوي' Category

اجازة بدون تقنية

أكتوبر 2, 2010

السلام عليكم

اليومين اللي فاتو كنت واخد اجازة بعيد عن التقنية بعيد عن اللاب و بعيد عن الكمبيوتر مفيش انترنت مع العيلة وبس اقصي ارتباط بيني و بين التكنولوجيا كان التليفون ومكنتش انا اللي بتصل كنت وخدة معايا عشان بس لو في حاجة مهمة جدا

كانو يومين تحفة بعد ما خلصت اخر حاجة كنت شغال فيها موقع Digg instant سافرت علي طول ولسة راجع من شويا ارجع بقي ارد علي الميل و اشوف اية الجديد

سلام 🙂

الصورة من موقع فلكر
الإعلانات

الحمد لله :)

يوليو 18, 2010

الحمد والشكر لله علي كل اللي حصل

انا مش مسدق اللي حصل, لا انا الحمد لله مسدئ اللي حصل بس مكنتش متوقعة بصراحة قدمنا المشروع باحسن شكل كان ممكن يتقدم بية الحمد لله و الظروف خدمتنا جدا و المناقشة كانت فوق المتوقع بصراحة و كان يوم تحفة مع الشباب امبارح وانهردة كان يوم جميل جدا بعد ما تمت مناقشة باقي الشباب و كلنا خلصنا علي خير الحمد لله

احمدك يا رب علي كل شيء يارب وفقنا في اللي جاي

تدوينة من داخل الكلية – مجموعة حجات

يوليو 10, 2010

المكان: كلية الحاسبات و المعلومات جامعة المنصورة – معمل 5

الزمان: دالوقتي بص علي تاريخ التدوينة بلاش عبقرية

تقربا اول مرة اكتب تدوينة من الكلية اة هي اول مرة انا كتبت من المدينة ابل كدة بس مش فاكر ان انا كتبت من الكلية ابل كدة المهم ادينا اعدين في المعمل كما يفرض القانون العبقري الفز الذي لا مثيل له الذي لا يعترف بامكانية الشغل اونلاين علي الرغم من ان احنا كلية الكمبرورر و بتوع النت والحجات دي -صحيح الواحد بيتعب شويا عبال ما يوصل لاي حد هوا المفروض بيشتغل اية والكلية دي هتطلعة يعمل اية غير انة يفتح سيبر-

المهم احنا بنيجي كل يوم عشان نشتغل في مشروع التخرج في الكلية مع بعض علي الرغم من ان احنا خلصنا جزء كبير منة في طول السنة و دة المفروض انة الطبيعي مش اختراع يعني ولا عبقرية مننا و بس الكلية مش مقتنعة !! المهم مجبر انك تتعطل كل يوم و تنزل تشتغل في الكلية طب احنا نسبيا مخلصين نشتغل في اية و الشغل اللي باقي كل واحد شغلة منفصل و مش محتاجين نتجمع غير يومين في الاسبوع مثلا

هوا موضوع الكلية مفيد برضو بس مش بالشكل اللي هم متخيلينة

حاجة من المجموعة

عرفين فلم the secret انا كتبت تدوينة عنة سابقا

المهم ان في مبدا من المبادء اللي بيتكلم عليها هوا قوة الشكر, تخيل ان تبدا يومك بالشكر و مدي القوي الموجودة في التصرف دة تصحي من النوم تقول كام حاجة انت شاكر ليها و تشكر ربنا عليها دة الشكر نفسة نعمة محتاجين نشكر ربنا عليها

حاجة من المجموعة

نحدي ظريف لكل اللي يقرا التدوينة دي يجيب ورقة و قلم و يحاول يكتب 100 حاجة هو بيحبها ورقة بيضاء كبيرة عنوان في النص فوق “انا بحب”و يبدا يكتب 1- كذا 2- كذا و يكمل و بعدين 100 دة رقم مش كبير احنا عيشين في الحياة دي كلها و معقول مش هنلاقي 100 حاجة بنحبها

بجد الموضوع دة مفييد جدا وبعدين تخيل لحظة حزن عندك و بصيت في الورقة دي هل هتفضل موجودة 🙂

حاجة من المجموعة

اتمنوا لينا التوفيق في المشروع ان شاء الله 🙂

زمان ايام ما كنت طالب …

يونيو 26, 2010

زمان ايام ما كنت طالب اعدت اربع سنين اسافر في القطار و السفر علمني …

زمان ايام ما كنت طالب كنت اعد في المدينة الجامعية و اتعرفت علي ناس كتير و …

زمان ايام ما كنت طالب كنت …

!!

هوا احنا خلصنا بجد تعليم جامعي 4 سنين عدوا بسرعة, ان شاء الله فاضل النهاية السعيدة مناقشة المشروع و استلام الشهادة و سعتها الواحد يعد كدة و ينجعص و يقول زمان ايام ما كنت طالب 😀

لو اعدت اتكلم عن الايام الحلوة و الصحاب الجدعان و كل الناس اللي اتعلمت منهم مش هوفي الموضوع حقة ابدا, الواحد فعلا  فرحان و سعيد لان كل ما يبص علي الايام اللي فاتت دي بتترسم علي وشي بسمة وهوا دة فعلا اللي بتمناه و بيسعدني اكتر و اكتر, في ناس كتير من اصحابنا معتبرين دي نهاية المطاف و فراق انا مش شايف كدة ابدا ان شاء الله اللي جمعنا الاربع سنين دول مش بالبساطة دي يجي اخر امتحان و يبعدنا عن بعض

وعشان كدة اختم كلامي و اقول شكرا لكل الناس اللي عرفتهم و الي لقاء قريب ان شاء الله 🙂

Exam 2010

يونيو 12, 2010

اخر امتحنات ان شاء الله في الكلية اخر ترم و اخر فاينل exam 2010

و بداية الامتحنات بتفكرني بفلم Exam (2009) لو حد شاف الفلم هيحس بالمقصود وللي مشفش يدور علي trailer

ان شاء الله تكون امتحنات سعيدة و كلنا نبقي qualified

🙂

بس يا ستي و قام معيط

مايو 24, 2010

كليتي الحبيبة فاضل علي اخر ترم ان شاء الله اسابيع ولاكن في الاربع سنين الكلية متغيرتش السنريو المعروف ايام الامتحنات مفاجئات مفاجئات مفاجئات

واحد قاعد في امان الله خير اللهم اجعة خير خير يجي ان بعد بكرة في شفوي و مناقشة مشروع : )) و يوم الجمعة في شفوي و الخميس اتلغي الشفوي ياحلاوة زاي كل ترم اشاعة طلعت علي الامتحنات غالبا بتبقي صح

بس يا ستي و قام معيط

@Smart-Village

مارس 26, 2010

امبارح كان يوم جميل جدا قضيناه في القريه الذكية و كارفور القاهرة , كانت جولة سريعة في القرية الذكية و باقي اليوم كان في كارفور

من اجمل الحجات ان كنا اغلب شباب 513 مع بعض وكمان قابلنا bingo و رجعنا مع بعض و اتكلمنا كتير و دحكنا كتير و استفدنا اكتر

و بعد ما رجعنا المنصورة سافرت انا علي الاسكندرية عشان يبقي شكل اليوم من 1- المنصورة 2- القاهرة 3- المنصورة تاني 4- الاسكندرية وبكرة مسافر تاني المنصورة !!

الاجازة

فبراير 21, 2010

كانت اجازة اسبوعين بس حلوة فيها حجات كتير

  • لف و سفر من اسكندرية لمطروح للقاهرة لاسكندرية تاني لفة تحفة
  • فرح اخت محمد صحبنا عقابل الجميع في مطروح واللمة مع الشباب اللي من هناك
  • معرض Cairo ICT2010  و لمة الشباب بتوع الكلية و الـ C@
  • اتعلمت شوية حجات جديدة الحمد لله
  • اهتميت اكتر بمدونة 7asobaty
  • الفلنتاين اللي اضيتة مع تامر و الاهلاوي و 513 كانت بتحتفل بالفلنتاين علي طريقتها
  • في نهاية الاجازة الخبر السعيد بفوز خدمة GoFast في مسابقة موقع Name.com للمشاريع الصغيرة

كل اجازة و انتو طيب

Alex the way i like :)

فبراير 7, 2010

رجعت من المنصورة يوم الاربع الصبح و كان استقبال اسكندرية بهوا شديد و مطر خفيف استقبال تحفة 😀

واعدت كام يوم منزلتش من البيت بصراحة كنت بنتقم من السفر

و امابرح نزلت انا و بودي و احمد صحابي اللي منها لله الكلية مش مخياني عارف اشوفهم انا في المنصورة و احمد هنا و بودي في السويس كان فاضلنا بس الرفيق الرابع محمد بس مكنتش ظروفة تسمح امبارح

المهم نزلنا و اتمشينا و لفينا شويا حلوين و رجعت ايام زمان مش زمان اوي بس كان جو واحشني جدا

peace 🙂

Back home :)

فبراير 3, 2010

الحمد لله الواحد رجع البيت بعد اسبوعين كل اللي يتقال عليهم الحمد لله انهم خلصو خلاص

وتبع اخر نظريات 513 “امتحنات الكلية زاي بولة الاستماشن

كل ترم بيعتبر جيم

  • معروف عدد اللمات اللي المفروض تلمها — اللي هيا المواد
  • لو لمة نقصت بتاخد -1 — لو لاقدر الله شلت مادة
  • لو لميت لمة زيادة برضه -1 — لو لقدر الله كان معاك مادة زيادة
  • ممكن الجيم يكون صعايدة — لو الدفعة كلها معرفتش تحل في الامتحنات
  • الجيم اللي بعدة بيتضرب في 2 — الدفعة كلها بتحتاج تترفع ودرجتهم بتتضرب في نسبة
  • احسن واحد اللي يلم لماتة كلها — اللي يعرف يعدي نضيف من كل المواد

وربنا يوفقنا في الجبم بتاع الترم دة – اصدي الامتحنات –

دة وقت الاجازة و اللاب و الـ Coffee و الشغل اللي ليه لزمة

هيا الاجازة مش كبيرة بس ان شاء الله الواحد يستغلها كويس و دة اول يوم الواحد بيريح و يفصل فية عن اللي حصل الايام اللي فاتت, و يبدا يرتب اولوياتة في اللي المفروض يتعمل في الاسبوعين اللي جاين 🙂