Archive for نوفمبر, 2008

بعد الحادثة :D

نوفمبر 27, 2008

ياه اسبوع فات بكل اللي حصل فية من ساعت ما كتبت البوست بتاعت قبل الحادثة ( قبل الامتحنات )

الحمد لله الامتحنات بتاعت الميد تيرم عدت بكل البلاوي اللي حصلت فيها

انا مرضتش اكتب عن الامتحنات و المساوئ اللي فيها مش بحب احتفظ بالزكريات الوحشة خلاص بطلت الحمد للهلاكن اللي كتبو غيري كتير

BooDy

انا بس اللي حبيت اقولة ان الحمد لله الفترة دي عدت ولاكن انا لسة هنا في المنصورة بقالي اكتر من 16 يوم !! لية مش عارف (هو في شويت حجات كدة لازم تخلص من هنا) و برضو مش هسافر الاسبوع دة و تئريبا اهلي نسيو شكلي في البيت لان انا كدة في الشهر اللي فات منزلتش اسكندرية غير 48 ساعة !! مش عارف انا حاسس ان انا في الجيش لية :)) يلا ربنا يسهل اهو العيد جاي و هشوف البيت ان شاء الله  ادعولي انتو بس

توضيح : الصورة اللي في اول البوست دة المنظر اللي بتخيلو دالوئتي ان الواحد يكون نايم علي الرملة علي شاطء البحر و مفيش حوالية ناس كتير و قمة في الهدوء و ادامك منظر البحر و السما و تكون الشمس بتروح و مفيش غير صوت الموج  و حالت استرخاء تام ……..

قبل الحدثة :D

نوفمبر 21, 2008

بما ان انهردة الجمعة اذا بكرة في امتحان 😀

ههههههههههههههههههه

البوست دي يا جماعة عشان افكر نفسي كنت عامل ازاي قبل الامتحان و قبل اسبوع الفرم اللي دخلين عليه ربنا يصبرنا و يقوينا علي اللي احنا فية

الكلية الموقره قررت تطبق نظام اسبوع الامتحنات المتصل (بالبلدي) كل يوم امتحان طول الاسبوع اللي جاي اة والله لا ومش دفعتنا بس دي كل الكلية بتمتحن بكرة ان شاء الله

بكرة يوم تاريخي في دورت حياه الطالب داخل الكلية , من موقعي هذا اقدر اقول ان بكرة هيبداء الـ …….. -حزف للرقابة- ايوة و كل واحد يكمل النقط علي مزاجة

من الاخر سلام عشان الحق ازاكر شوية عشان اعرف اتنيل اكتب بكرة

بس مكنش ينفع يكون بكرة بدايت اسبوع العزاب في الكلية و مكتبش حاجة

ملاحظة اخيرة : شيفين الواد اللي في الصورة اللي فوق دة الورقة بتعتة بيضه ازاي 😦 اوعو حد يعمل كدة بكرة

هههههههههههه سلام

مطر :)

نوفمبر 7, 2008

مثل ما كتبت عن المطر قبل كدة في بوست قديمة, انا فعلا بحب المطر 🙂 , بجد مش عارف هل الاحساس دة طبيعي ولا هو اية بس لما رجعت عشان اكتب عن المطر و رجعت للبوست الاديمة دي وجدت ان احساسي هو هو من وقتها لم يتغير نفس الحب للمطر و الاحاسيس المتضاربة اللي بيولدها عندي …. جميل 🙂 .

دي برضو بوست المفروض انها تتكتب من زمان و انا كنت مئجلها لظروف كتبت عنها المهم ان الفرصة دالوقتي عشان ارجع و احس نفس الاحساس تاني

كنت في اول الشتاء مستني المطر و نتيجة للدراسة في المنصورة اصحابي اتصلو بيا من اسكندرية عشان عرفين ان انا بحب المطر و قالولي انها بتمطر هناك 😦 والله كنت عايز اسافر بس مينفعش المهم في اخر الاسبوع نزلت الاجازة و يوم ما رجعت اسكندرية كان في مطر في المنصورة و دمنهور و حتت كتير لاكن اسكندرية لا :(( والله انا مش عارف اعد فين طيب , و حتي لما رجعت المنصورة اليوم اللي شتت فيه كتير و كان تلج مكنتش في الشارع كنت لسة راجع المدينة و كنت تعبان و مش قادر اتحرك

لاكن الحمد لله كان في مطر في يوم و انا في الشارع هو مكنش كتير ولا كان خفيف هو كان بالظبت اللي انا بحبة , محدش يعرف المتعة اللي انا كنت فيها غير اللي بيحب المطر بالاسلوب دة

مش هعرف اوصف احساسي غير بنفس الكلمات اللي كتبتها قبل كدة

انا اعشق المطر و وجودي تحت المطر
عندما انظر لقطرات المطر
اجدها …. اعجز عن وصف الحساس
دائما ما يصل بي المطر الي احساس جمل و احيانا احساس مخيف
لكن في اي حالة انا اعشق المطر
الا تشاركوني الراي في جمال المطر
عند التواجد في الشارع اثناء المطر و هو يتساقط علي
ارى الجمال…
النقاء
الطهارة
القوة
الحرية
الخوف
الوحدة
الشفافية
الحب
الامان
الغضب
و الهدوء
كل تلك الاحاسيس و اكثر
رغم تناقض الاحاسيس لكنة احساس قلة من يستطيعو الوصول لة
و اود ان اقتبس جزء من كتابة رولا في تدوينتها

شكرا لكي يا قطرات

على نقلي للحظات

لحظات خالية من الآهات

———————–

تلك كانت قطرات ذوبتني و أخرجت مني كلمات

شعور لن انساة

عودة بعد غياب عن الانترنت

نوفمبر 5, 2008

disconnected

بعد غياب من يوم 17 اكتوبر مكتبتش حاجة لاكن كنت بـ انتظام اتابع البلوج حتي لو مش هكتب اصبح اساسي اني ادخل علي البلوج و اتابع الردود اللي بتتكتب و كدة , ولاكن نتيجة للرجوع للجامعة و السفر للمنصورة و المدينة الجامعية اصبح من الصعب الدخول بـ استمرار علي النت نتيجة للشبة الـ (تيـــــــت) من الويرلس في الجامعة و كمان مش كفاية ان الشبكة بتهيس و ممكن النت يفصل و يرجع كل 5 دقايق بدون مبالغة , لا كمان الكونكشن يكون مقطوع لمدة 3 ايام .

دي فترة انقطاع النت اللي ؤلت اني هكتب عنها في البوست اللي فات ايوة هم 3 ايام مش فترة طويلة لاكن اصبح من المستحيل ان الواحد يبعد عن النت اكتر من يوم او 2 بالكتير و في التلت ايام دول ممكن تحس ان انت معزول عن العالم كلو و متعرفش اخبار اي حاجة , ولا الاخبار بتاعت الحداث اللي بتحصل في البلد ولا حتي لـ اصحابك و كمان انا اخويا مسافر الخارج و بتواصل معاة اغلب الوقت من علي النت اذا انت معزل تماما بدون نت ولا حتي عن اخبار الكلية لان الكلية ليها منتدي و هو يعتبر المصدر الاساسي للاخبار , و في خلال الفترة دي تلاقي حجات كتير حصلت و انت متعرفش .

رغم ان انا بنفسي ابل كدة بعدت عن النت و عن الكمبيوتر حوالي اسبوع بـ اختياري عشان اجرب هل انا تحولت لمدمن انترنت ولا لا و دن كان بعد معرفت ان في امراكز علاج في اليبان من ادمان الانترنت !! , لاكن اكتشفت ان الموضوع عادي و ان الواحد فعلا سعات بيحتاج الفترة دي من البعد عن الكمبيوتر و اعادة ترتيب الافكار .

المشكلة ان الفترة بتاعت الـ 3 ايام دي كانت ايام صعبة لان فيها حجات كتير محتاجة تواصل و ان انا اكون اونلاين كل يوم بس الحمد لله الكونكشن رجع و اهو النت شغال و بيفصل زي العادة بتعتو و تمام .

انا كمان اللي بيخليني استغرب ان انا كنت قرات خبر عن ان اليبان اصبح فيها خط نت سرعتو 1 جيجا !! كان جالي الخبر دة علي الريدر و مش فاكر المصدر بصراحة بس هي حاجة تجنن لما هم يكون عندهم دة العادي و عندنا العادي خط الدايل اب اللي سرعتو بالكيلو 😦 يلا كلها بتاع 80 او 90 سنة عبال ما اللي في مصر يعرفو حاجة زي دي و يبدئو يفكرو يطبقوها في خلال 60 سنة تانية :)) و يسيبو الوصلة بتاعت السيبر

يلا كفاية كدة و ان شاء الله ارجع اكمل المواضيع اللي ناوي اكتبها بس ادعولي ان النت يفضل شغال و ميفصلش

سلام 🙂

بلوجي الحبيب :)

نوفمبر 4, 2008

🙂

انا سعيد جدا جدا 🙂 لان البلوج مفتوح ادامي دالوئتي بعد حوالي 3 ايام منغير نت خالص خالص و دي ايام مش سعيدة خالص

في حجات كتير عايز اكتب عنها ان شاء الله اول ما الاقي فرصة بس احب اسجلهم هنا عشان منساش

  • عن فترة انقطاع النت
  • عن المطر
  • عن المشروع بتعنا في الكلية
  • عن الكلية و النام بتاع المواد
  • عن الوقت و تنظيمة
  • عن الاسكوب

لو انا نسيت حد يبئا يفكرني بالحجات دي 😀

سلام