اسكندريــــــــــــــــــة

أغسطس 19, 2008

اسكندريــــــــــــــــــة

يا اسكندريــــــة

بحرك عجايـــــب

ياريت ينوبنى م الحب جانـــب

تحدفنى موجــــه

على صدر موجــــه

والبحر هوجـــة

والصيد مطايــــب

أغسل هدومى

وأنشر همومى

على شمسه طالعه

وأنا فيها دايب

*************

كأنى فلاح من جيش عرابى

مات ع الطوابى

وراح فى بحرك

كأنى نسمة فوق الروابى

م البحر جيّه

تغرق فى سحرك

كأنى كلمة من عقل بيرم

كأنى غنوة من قلب سيد

كأنى جُوّا المظاهرة طالب

هتف باسمك

وراح معيّد

كأنى صوت النديم

فى ليلك

بيصّحى ناسك

يشدوا حيلك

كأنى طوبة من بيت فى حارة

كأنى دمعة

فى عيون سهارى

كأنى نجمه فوق الفنارة

تهدى الحيارى

والبدر غايب

***************

يا اسكندرية

يامصراوية

على سنْ باسم

على ضحكة هالّـــه

البحر

شباك ومشربية

وانتى الأميرة

ع الدنيا طالّـــه

**********

يا اسكندرية عاشق

وبدى

ارتاح فى حضنك

والود ودّى

يكون كلامى

عربون غرامى

وبالمحبه ناخد وندى

يا اسكندرية فيكى الغلابة

ع الرزق يسعوا ولا يناموش

صبح صباحهم

رجع مساهم

وزاد شقاهم

وما ارتاحوش

ياعينى ع اللى الزمان تعبهم

وضاع تعبهم

ومالتقوش

نزل شبكهم

فى بحر طامى

طلع شبكهم

على فاشوش

وفيكى بين البشر

ديابه

وفيكى فوق البشر

وحوش

وفيكى ناس مغرمين صبابه

لو خان زمانهم

مابيخونوش

وفيكى خمرى

سلمت أمرى

ما أقدرش اشوفه

وما اغنيلوش

**********

سمك يا بنى يا اسكندرانى

فى العشق واحد

مالكش تانى

سمك يابنى يا اسكندرانى

فى الحسن ساحر ومعجبانى

***************

سمك يا بنى

والعشق غيّه

تبدأ بنظره

تبقى ملاغيه

وكل عاشق وله بهيه

وكل شاعر وله أغانى

وانا اللى عشق الصبايا كارى

أعشق و أغنى

ما اقدرش أدارى

وأى نظرة بتجيب قرارى

وايشحال عيونك

يا الاسمرانى

…..

كتبها ابو النجوم فى يناير 1976 اسكندرية وهى من القصائد اللى غناها الشيخ امام

Advertisements

رد واحد to “اسكندريــــــــــــــــــة”

  1. Ro0oFY Says:

    تحفه طبعا ومش محتاجه كلام
    وبصراحه انا بحسد اسكندرية على حب اهلها ليها
    واكيد مش الاسكندرانية بس اللى بيحبوها
    انا كمان بعشق اسكندرية مع انى مش منها
    شكرا يا بشمهندس ع القصيدة


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: