Archive for أبريل, 2008

Crazy

أبريل 23, 2008

مفيش حد حس سعات ان الناس كلها بتعاملة علي انة مجنون , وان مفيش حد فاهم اية اللي الواحد بيعملة او بيعملة لية رغم ان ممكن تكون حاولت توضح الفكرة او تبسطها و حاولت كتير ان انت توضح ان اللي بتعملة دة لسبب مش جنون وخلاص !!

لا فعلا سعات في مواقف بتحصل او ممكن مش مواقف هي غالبا بتكون فترات انا كان في اغنية كنت شفتها زمان و مكنتش فاكر اسم المغنية او اسم الاغنية علي الاقل ,بس كنت فاكر جزء من الكلمات ( اية علاقة الاغنية باللي بنتكلم فية دة !! ) هي الكلمات بتاعتها بتعبر فعلا عن اللي بتكلم علية بالظبط

جزء من الكلمات :

Sometimes I try to talk to people
They don’t get a word I say
I try to keep it plain and simple
They just think that I’m crazy

والله صح هو دة اللي بيحصل بجد

بس المشكلة ان الواحد برضة احيانا بيوصل لمرحلة ان هي مش فارقة معاك الناس تعتبر اية اللي انت فية دة و حكم الناس برضة سعات بيكون متعلق بـ المناظر و انا كنت اتكلمت عن الموضوع دة قبل كدة في تدونة سابقة و لو الواحد وصل لمرحلة يصعب فيها التواصل اعتقد ان الرد هيكون برضة زي ما جة في الاغنية

you think i’m crazy?
Well you know what (ha) damn right i am

I’m crazy but it’s ok, i don’t mind
To get crazy but it’s ok, it’s allright
Well I’m crazy but it’s ok, i don’t mind
To get crazy but it’s ok, it’s allright

اعتقد فعلا ان دة اللي هيكون الرد بصراحة مش لاقي اي رد ينفع غير كدة 🙂

احلا حاجة في الكلية دي ان مفيهاش بزر

أبريل 22, 2008

😀

حاسبات و معلومات جامعة المنصورة – مصر

ايون هي دي الكلية بتعتي و انا فخور بيها بصراحة . من مميزات الكلية الكتير طبعا ان انت ممكن تكون في اول الدراسة عايش حياتك تماما و لا اي حد يسئلك علي اي حاجة و لا يكون لازم تزاكر ولا اي حاجة خالص

بصراحة كل اصحابي بيحسدوني عليها لان ديما اكون انا فاضي و هم وراهم تسكات مثلا و شيتات و كلام من دة انما تلاقي ان اغلب اللي في كليتي فضيـــــن خالص , و حتي فترة امتحنات الميدتيرم عند الناس كلها احنا بنكون فضين ( سبحان الله ) و كل اللي اعرفهم بيكونو بيمتحنو و احنا لسة !!

لكن المفاجئات تبدا في التوالي خير اللهم اجعلة خير تلاقي دكتور داخلك محاضرة يؤلك المحاضرة اللي جاية امتحان !! ماشي و تطلع السكشن في نفس اليوم تلاقي المعيد/ه بيؤلو هات الشيت الاسبوع اللي جاي و سلم التسكات (انهي تسكات هو حد كان طلب حاجة و احنا ؤلنا لا ,لا بس هي كدة برضة ) و المشروع بتاع المادة ( الله سبحان الله هي الحجات دي بتطلع مرة واحدة ولااية ؟ )لازم تسلم كل دة في اسبوع واحد

و المشكلة اللي بجد تلاقي تاني يوم في محاضرة تانية لدكتور تاني بيؤل نفس الكلام طيب و علي كدة تلاقي ان عندك اخر اسبوعين قبل امتحنات الفاينال امتحنات بالهبل و تسليم حجات كتييـــــــــر و بعدين تاخر يومين راحة عشان تبدا الجولة التانية من مطش المصارعة مع المواد و تبداء تمتحن الفاينال

كل ما الامتحنات و الشيتات و التسكات تكتر فورصتك في اللسعان تكبر

وعجبي

بدون عنوان

أبريل 22, 2008

ياااااااه بئالي كام يوم مكتبتش حاجة

واضح ان انا ادمنت التدوين خلاص ,حتى لو مش بكتب فـ لازم ادخل علي البلوج و علي الريدر كل يوم عشان اشوف الناس كتبت اية .

طب انا دالواتي داخل اتكلم في اية ؟ مش عارف والله بس حاسس ان انا لو مكتبتش هيجرالي حاجة ,في حجات كتير حصلت الايام اللي فاتت من اول الكلية و الامتحنات … لحد ….. و كمان شوية حجات كتير كدة و ضغوط كتير لاكن انا بجد كنت محتاج وقت اراجع فية مع نفسي كل حاجة كل حاجة و ابدا اراجع اولوياتي

بس اعتقد ان انا الحمد لله كان ادامي الفرصة ان انا اراجع كل حاجة في اليومين اللي فاتو دول اخدت يومين لوحدي ولوحدي بـ معني الكلمة كنت انا و دماغي و الكيبورد بس 😀 و اخدت خطوة ان شاء الله في الطريق الصحيح
يارب وفقني

دي مناظر !!

أبريل 16, 2008

موضوع لفت نظري كتيـــر اليومين دول

المناظر VS الشخصية

ياترى الواحد بيحكم علي الناس ازاي بالمنظر و اللبس ولا بالشخصية والتفكير , طبعا منكرش ان كل الحجات دي مهما لاكن اية اساس الحكم

طب نفرض موقف و نحطم علية : بما اني في الجامعة نفرض ان انت مثلا واحد معاك في السكشن\الكلية\الجامعة كل اللي بتشوفة من الانسان دة شكلة و مثلا لو في موقف خلاه يرد او يتكلم في السكشن(انا مبحضرش محاضرات 😀 ) فـ برضة كل اللي نعرفة دالواتي شكلة و صوتة و مثلا اسلوبة في الرد

* يوم جة الواحد دة يوم مثلا و كان مهيس و عايش حياتة مع اصحابة و ماضي اليوم دحك و لعب و هزار مع الناس كلها

الحكم : دة واحد لعبي و واخد الحياة هزار و مبيعملش حاجة ليها فيدة …..

* يوم تاني جة نفس الواحد برضة بس كان في موقف معين او حاجة في دماغة شغلة تفكيرة و اعد ساكت و لوحدة ولا بيكلم حد من الشلة و لا بيعمل اي حاجة

الحكم : لا دة شكلة انطوائي و معئد و ملوش لزمة ابعد عنة احسن …….

اعتقد ان في اليومين دول نفس الانسان هو هو و اخد حكمين مختلفين تماما !! لو مثلا انسان تاني كانت دي اول مرة هيشوفة هيكون حكمة علية غالبا حاجة من الاتنين دول , رغم ان انا مثلا معرفش الانسان اللي ادامي دة لاكن ممكن احكم علية حكم قاسي زاي دة بمجرد شكلة في وقت معين

ايوة انا مبنكرش ان المنظر و الانطباع الاول للانسان ليهم جزء كبير في الحكم علية لاكن كلنا مبنفكرش ان كل واحد فينا بيمر بـ ايام زي دي و ممكن يلاقي اللي يقول علية نفس الكلام سبحان الله !!

انا اللي بتكلم علية ان انا مش بحط قرار نهائي علي انسان منغير ما اتكلم معاة , اشوف كلامة او اي حاجة تدل علي اسلوب تفكيرة لان دي فعلا ممكن تفسر كتير جدا من اللي الواحد بيشوفة و مش عارف يفهمة او بيفسرة غلط و بجد في ناس خسرت كتير جدا من مجرد الاحكام المتسرعة علي البشر

و اللي يوضح الكلام دة لو عرفت فعلا رائي الناس فيك او في اي حد انت تعرفة معرفة وثيقة(حلوة “وثيقة” دي 😀 ) و تكون عارف اسلوب تفكيرة او فاهمة كويس و تجد ان في ناس اطلقت علية احكام بمجرد مشهد او موقف هم مشفهمينة !!

اكيد موقف معين ولازم يكون واضح ممكن يخليك تغير رائيك عن شخص لاكن لازم الموقف دة يكون واضح لك من كل ابعادة

انا فعلا قررت اراجع اسلوبي في الحكم علي البشر و علي اي حد بتعامل معاة و كل انسان فعلا المفروض ان هو يكون ادامة فرصة للتفسير ( رغم ان هو غير مطالب بالتفسير دة ) و توضيح اسلوب تفكيرة .

و ان شاء الله هرجع اكتب في موضوع ان الانسان مطالب بتفسر ولا لا

بس ياريت الواحد يبص علي الاحكام اللي اطلقها بتسرع و لو وجد ان هو صح اذا استمر ولو غلط ياريت نراجع نفسنا 🙂

we must Sleep

أبريل 13, 2008

دة موضوع كبير

انا لسة دالواتي حالا كنت شايف حلقة من برنامج 60 minutes وكانو بيتكلمو عن ابحاث معمولة عن النوم !!

انا في البداية محسيتش ان الموضوع ليه اهمية كبير لحد لما بدئو يتكلمو مع الدكترة و الباحثين في الموضوع دة , و اتكلمو عن ابحاث عملوها و عن النتايج المزهلة اللي خرجو بيها

فكرة البحث ان كان في حواللي 4-5 متطوعين للاختبار و كان مدتة اسبوع و نصف و الموضوع انهم مش هيخلو المتطوعين ينامو اكثر من 4 الي 5 سعات يومي فقط و الكلام دة دام لمدة 5 ايام

النتايج : من بعد اول يوم تم اثبات ان ردود افعالهم اصبحط ابطا و اصابتهم بـ ضعف في الذاكرة و عدم التركيز و بدا تلف تراكمي في الاعصاب -الموضع يخوف مش كدة- بس كل دة من بعد اول يوم و يوم بعد يوم التاثير دة بيزيد و يكبر

و كانو في المركز غير معرضين لـ اي نوع من انواع المنبهات (الكفايين) كما قال الباحث (مش فاكر اسمة) وهو قد يساعد قليلا في البدايات ولاكن قد تصل الحالات الي مرحلة لا ياتي الكفاين او المنبهات معها بـ اي نتيجة

و من الاخطار ايضا ان الانسان الذي لا ينام الوقت الكافي قد يري انة تكيف مع قلة النوم و يظن انة يستطيع العيش من ذالك ولاكن ايضا الابحاث نفت ذالك تماما !! (مع اني كنت فاكر كدة) و ايضا تم اثبات ان كثير من اخطر الحوادث علي مستوي العالم قد كان احد الهم العوامل بها هو قلة النوم مثل ( مفاعل تشرنوبل – تسرب النفط من احد ناقلات البترول – …. )

و ايضا قد ينتج عن قلة النوم النوم المفاجئ !! لا اعلم كيف لكنة قابل للحدوث مثلما يكون احدهم يقود لفترة طويلة و يسقط في النوم فجئه (ودة احد اكبر اسباب الحوادث) و قد يحدث ذالك و عين الانسان مفتوحة (ينام و عنية مفتوحة !!)

بجد انا بعد الحلقة دي تزكرت برنامج تاني كنت شفتة قبل ذالك يتكلم عن نفس الموضوع و يتحدث عن مدي الضرر في الاعصاب الذي قد يصيب الانسان بسبب قلة النوم , وفي نفس البنامج تحدثو عن الذي لا ينام ساعات كثيرة متواصلة و الاضرار ايضا كبيرة جدا و منها ان ردود افعالة تصبح اكبر من حجم المواقف ولا يتحكم بها الجزء المنطقي في العقل .

الموضوع دة بجد بيمسني و بيمس ناس كتير اعرفهم و بالتحديد نفسي كل اصحابي من “الكائنات الليلية” 😀 يقرئو الموضوع دة الناس اللي مبتنمش غير بنهار و اقتربو من التحول الي vampires دة الواحد اصبح بيعاني من تعرضة للشمس 😦 و نداء كمان لـ ابطال المذاكرة بالليل

ياريت الواحد فعلا يراجع نفسة في اللي هو بيعملة دة و يرجع للاصل و زي مقال لينا ربنا ان النهار للمعاش و الحية و الليل للراحة

بما اني بكتب الموضوع دة دالواتي الساعة 4 فجرا اذا اول حاجة المفروض اعملها اني اخش انام و بسرعة كمان 😀

و انت كمان لو بتقرا الموضوع دة بالليل خش نام

يلا تصبحو علي خير

اعترف بصراحة (حوار بيني و بين نفسي)

أبريل 12, 2008

محدش متخيل مقدار الصعوبة اللي انا بواجها دالواتي و انا بكتب البوست دي

تاريبا دي 3 مرة اكتب و امسح اللي كتبتة كلة

انا عشت انهردة يوم صعب جدا معرفش لية !

بجد كنت داخل في دور حزن رهيب مع ان دة عكس تماما الايام اللي فاتت يعني اليومين اللي فاتو انا كنت عايش ايام بجد جميلة جدا و كنت فرحان و سعيد و بعمل كل حاجة تيجي فـ دماغي يعني يومين من الاخر

لاكن جيت من امبارح بالليل و المود بداء يتغير معايا خالص !!

احساس بـ ملل رهيب .. , مخنوء .. , زهئان من كل حاجة .. , حاولت اخرج اغير جو و اعمل اي حاجة تخرجني من الاحساس دة لاكن برضة احساس الملل و الروتين جالي من كل الاماكن اللي بخرجلها ! و الحل البسيط جدا رجعت البيت منغير معمل اي حاجة

و قائمة المواضيع اللي ممكن تساعد علي الاكتئاب بدئت تكبر و الموضوع كان هيبوظ مني خالص و الجملة السحرية اللي كل ما حد يسئلك مالك تؤلو “مشعارف والله زهئان ” طب من اية “مشعارف”

لاكن لا انا من رئيي ان كل واحد فينا عارف اية اللي مدايئة او اية اللي بيدايئة الموضوع مش محتاج غير انك تعد معنفسك اعدة صراحة وتدور جواك علي اسباب الموضوع سعتها بس هتعرف اية اللي مدايئك و هتكون اول خطوة عشان الموضوع يتحل

انا فعلا حاولت اطبق الكلام دة عليا و عرفت احدد اية اللي كان مسببلي الحالة دي ..(بس مش هؤلوكم هنا) و اعتقد ان الموضوع كدة اصبح ابسط و اوصح كتيـــــــــــر

و ممكن اي حد فينا يحتاج انة يجلس مع نفسة عشان يوصل لحاجة جواة بس مش واضحة ادامة

بس اهم حاجة ان الواحد يوفر لنفسة الجو المناسب يعني مثلا

  • منغير مقاطعة من اي حد
  • جو هادى بدون ضوضاء او تشتيت
  • ممكن في ناس تحب تعمل الحوار مع نفسها بصوت عالي (بس خاللي بالك محدش يسمعك عشان ميؤلوش الواد/البنت اتجنن) عادي دة انا دخلت عملت حوار معايا علي البلوج (او ممكن الواحد يكون فعلا لسع خلاص)
  • اعتقد ان اهم حاجة الصراحة (انت بتكلم نفسك هتتكسف من اية)
  • ممكن مثلا تخلي معاك ورقة و قلم و تكتب شوية افكار (سدئوني هتكون مفيدة)
  • اي حاجة تنية توصلك للجو المناسب…..

ياريت فعلا اي حد يستفيد من الموضوع دة و نخرج خارج ديرة “معرفش ماللي”و نواجة نفسنا بصدق

و ياريت انا استفيد منة و اخرج من الحالة دي بسرعة (دة احنى دخلين علي امتحنات)

يلا كفاية كلام

سلام

كلمات …

أبريل 10, 2008

غرفتي و اللاب و الاضائة

النسكافية و الكتابة

قلم و ورقة و الوحدة

التفكير و الزكرى

الناس و الزحمة و الحياة

الاصدقاء و العزلة

امل و شوق وحيرة

الطموح و الغيرة

التئمل و النظر و الفكرة

المستقبل و بكرة

just say yes

أبريل 5, 2008

امبارح في احد حالات الروئان و برضة و انا جالس علي البحر في الاسكندرية

كنت اعد علي البحر انا و BooDee صحبي حوالي الساعة 12 بالليل

( وقت تحفة بجد )
و اذ الكلام بدا علي موضوع الجواز و المستقبل و الحجات دي …

وبرضة اذ مرة وحدة في وصت الكلام الائي الواد بيقولي

“تعرف ان البنت مش مطلوب منها غير انها تحب واحد بس و متعملش اي حاجة تنية “

انا مش مسدئ نفسي الكلام دة بجد ولا بحئ و حئيئي !!

تسدئو انة فعلا صح ههههههههههههههههههههه

ههههههههههههههههههههههههههههههههههههههههههههههه

انا فضلت ادحك علي الموضوع دة بعد لما سمعت السطر دة يجي 10 دقائق متواصلة

فعلا هي مش مطلوب من البنت انها تعمل اي حاجة تنية !!

الواد هو اللي بيتنيل علي عينة يحب بنت و لو هي حبتة اذا هيكون طاير من الفرحة و علي استعداد انة يعمل اي حاجة عشانها سبحان الله فعلا صح بعد ميلائي نفسة بيحبها و هي بتحبة يبدا المشوار الازلي اللي اتكتب علي كل راجل

مبدائيا لازم يكون مجهز نفسة ماديا للجواز او يجهز نفسة بـ منتهي السرعة

ويكون متخرج و بيشتغل شغلانة محترمة و يكون مرتبة مشعارف = كتيـــــر

و يجهز الشقة طبعا

ويجي اهل العروسة يعدو يتشرطو علية و يؤلولو لازم كذا و كذا

و يسئلو علي اهلة و فصلة ولا كئنة داخل الكلية الحربية

سيبك ياسيدي من كل دة

مثلا هي وفئت علية و اهلها وفئو اذا

هو اللي هيدفع كل حاجة ( محدش يؤلي ان العروسة عليها حجات مهو والدها او اخوها هو الي بيدفع مش هي اذا برضة هو الراجل ) بلاش بيدفع ابل الجواز لا وكمان بعد الجواز هو اللي بيشتغل و يصرف طبعا مش مطلوب من الزوجة ان هي اللي تشتغل خالص دة ناتج من تقاليد المجتمع (ماعلينا يلاش سيرة العادات و التقاليد دي عشان دة موضوع كبير )

في النهاية كلنا اتئكدنا ان اللي مطلوب من البنت بس ان هي تحب واحد و هو هيعمل المستحيل عشانها

و في بعض الحالات مش تحبة لاكن تقول “اة موافقة علية” بث 😀

بصراحة اعتقد ان كل الرجالة بيتمنو اليوم اللي يلائو فية حد يحبهم و هم هيبذلو المستحيل مقابل الحب دة

وعجبي

🙂

1-4-2008

أبريل 3, 2008
يوم جميـــــــــــــــــــــــــــل جدا
يوم بجد ميتنسيش مع الصحابي كلهم
كنا في رحلة الى دريم بارك
اجمد حاجة ان احنا كانت شلتنا كلها موجودة مع بعض
و كان يوم ميتنسيش هياس و لعب و جري و Discovery
اة دي لوحدها مصيبة بس بجد بجد لعبة جمدة جدا
و بعد دريم بارك رحنا الحسين
و لفينا هناك و عشنا يوم ميتنسيش
و اعدنا نغني لحد لما الواحد صوتة راح
( من الغناء مش من الصويت 😀 )
و احسن حاجة ان احنا كنا كلنا مع بعض
كلنا كلنا 😉

انا نجحت الحمد لله

أبريل 3, 2008
الحمد لله
الف حمد و شكر ليك يارب
جبت نتيجة الترم الاولاني و نجحت الحمد لله
منغير مواد و دة انجاز عظيم
خصوصا ان انا كنت تعبت في اخر امتحان و سيبت الامتحان و مشيت
مع انها المادة الوحيدة اللي كنت ناوي اجيب تقدير فيها
الحمد لله
و عقبال كل تيرم يارب
و عقبال كل الشلة
و كل اعضاء 513